Guilielmi Perkinsi Problema de Romanæ fidei ementito Catholicismo Estq́[ue] antidotum contra Thesaurum Catholicum Jodoci…Guilielmi Perkinsi Problema de Romanæ fidei ementito Catholicismo Estq́[ue] antidotum contra Thesaurum Catholicum Iodoci…

1 Veteres sive Ecclesia Christiana, Canonem Judaeorum sive V. Testamenti, verum & perfectum agnoscunt: & proinde Libros qui dicuntur Tobiae, Judith, Sapientiae, Ecclesiastici, Maechabaeorum, è numero verè Canonicorum per omnia penè secula apertè excludunt. Athanasius in Synopsi dicit, Praeter istos [duos & viginti libros Canonis Judaici] alij praeterea libri sunt U. Testamenti qui non sunt Canonici, quique solùm à Caetechumenis leguntur, ut Sapientia, & Ecclesiasticus, &c. Cyril. Hierosolymit. catechesi 4. Istorum (inquit) hos viginti duos libros lege: cum apocryphis verò nihil habeas negotij: has tantùm studiosè meditare scripturas, quas in Ecclesia confidenter legimus. Multò prudentiores te & religiosiores fuerunt Apostoli & primi Episcopi veritatis duces, qui nobis eas tradiderunt. Tu igitur quum sis filius Ecclesiae, non transgrediaris illius terminos. Ac veteris Testamenti, ut dictum est, viginti duos meditare libros. Cyprianus, sive Ruffinus in expositione Symboli, de Canone Judaico, ait: Haec sunt quae Patres intra Canonem concluserunt, ex quibus fidei nostrae assertiones constare voluerunt. Sciendum tamen est, quòd & alij libri sunt, qui non sunt Canonici, sed Ecclesiastici à maioribus appellats sunt, ut est Sapientia Salomonis, & alia Sapientia quae dicitur filij Sirach—. Eiusdem ordinis est liber Tobiae, & Judith, & Machabaeorum libri. In novo Testamento, libellus qui dicitur Pastoris—. quae omnia legi quident in Ecclesiis voluerunt, non tamen proferri ad authoritatem ex his fidei confirmandam. Epiphan. lib. de mensuris & ponder. post recitatum canonem, de Sapientia Salom. & de Ecclesiastico ait, Utiles quidem & commodi sunt, sed in numerum rece•t•rum non referuntur: quare neque in Aaron, neque in Testamenti arcam repositi sunt. Eadem penè verba habentur apud Damascen. lib. 4. de fide, c. 18. Nazianz. certò pronunciat de Canone, in Carminibus de genuinis S. Scripturae libris,