Vitæ selectorum aliquot virorum qui doctrinâ, dignitate, aut pietate inclaruere

Percharum quoque habebat, adibat, sectabatur, Georgium Ludovicum Huttenium, Equitum Francorum decus & jubar; qui antiquissimae familiae dignitatem varijs maximisque virtutibus adaequabat. Nec exiguo apud eum in pretio videre erat Wolfgangum Zundelinum, Principibus Germaniae carum caput, virum totis tribus lustris in Italia versatum; qui rerum gravissimarum momenta eá Venere, ijs expromebat Gratijs, ut dubium relinqueret, plusne ornamenti acc•deret rebus à diction ejus lectissima, an orationi ponderis foret à rerum gravitate. Hujus quoque contubernio usum quandoque Dhonanum accepimus: quandoque & Baronum Lichtensteiniorum; quos partim Moravia nunc habet, partim Austria. Amicos inibi colebat Philippum Sidnaeum, Angliae sidus praefulgidum, & Hubertum Languetum, virum multiplici erudition, ac praeclara rerum cognitione, & experientia praestantissimum. Extant epistolae, amicitiae hujus documenta & indices, quae jam prodiere in vulgus, nihil minus quam vulgari elegantia exaratae. Et mirabimur Dhonavium indies egregia cepisse sapientiae incrementa, qui ingenio ipse plurimum polleret, & his talibus tantisque viris, familiarissime uteretur? Hippocratiden legimus, cum obviam forte veniret adolescentulo, qui propter comitem suum erubesceret, castigasse eum his verbis, Cum illis ambulandum ¹foret, quibuscum conspectus colorem non mutares. Nempe, praeterquam quod hominum turpium convictu mores inficiantur, probrum etiam atque ignominiam inde referimus. Contra vero sapientum bonorumque commercium honori nobis esse solet: ac familiaritas eorum haut aliter virtutem animis nostris instillat, ac diutius haerentibus in tabernis unguentarijs vestis exterior odour loci imbui solet. Nondum exsatiata Dhonano peregrinandi cupidi•as erat: neque enim pauxillo potu magna fallitur sitis. Ergo dum studium ⟨p. 460⟩hoc, & nobilior sanguis, circa cor fervet, per Taurinorum montes ad Gallos abit, atque Allobroges. Genevam ut venit, urbem vetustissimam juxta, ac rerum omnium uberrimam unica ei cura fuit proficiendi amplius tum in negotio scissae adeo misere religionis, tum in justi & aequi sapientia. Alterum percipere licebat ex V. Cl. Theodoro Beza; alterum consequebatur à Francisco Hotomanno, ex antiqua & nobili Ottomannorum familia apud Silesios oriundo, Jurisperito, eximio, atque undecunque doctissimo.